繼續小女子的《十大最憎》…
6.好熟呀依家？ 話說我是天生自閉仔一名，無論星座命盤紫微斗數抑或九型人格，都指出我最需要私人空間，最怕與陌生人打交道。奇怪的是我竟然在傳媒工作，每天要跟無限數素未 謀面的人講電話，做訪問！不過這都未算最憎（可能因為工作時候的那個其實「笨」不是我），最憎的是，有些人明明才是第一次見面，就扮晒同你懶熟。繞手攬頸乞人憎不在話下，摩打嘴不停講（一些我根本dun give a shit的）嘢實在夠煩，更試過有朋友仔的男友第一次見我就直呼我的中文全名！嘩！好熟呀？你邊位呀？（雖則事隔十年依家又真係同你幾熟咁嘅…死嘢！）憎爆指數：憎憎憎憎
7.芫茜蔥 叉燒腸裡的，魚旦粉裡的，腐皮卷裡的，生牛河裡的，皮旦魚片湯裡的，生炒糯米飯裡的，香煎藕餅裡的，肉碎蠔仔粥裡的，山竹牛肉球裡的，蒸素餃裡的，担担麵裡的，鯪魚球裡的，蠔餅裡的，西湖牛肉羹裡的，用來伴碟的，蘸泰式生蝦那碟酸辣汁裡的…總之任何沾有芫茜的湯粉麵飯點心小菜都好難食，好討厭，好乞人憎啦！撩極都撩唔走嘅！憎爆指數：憎憎憎
8.吊靴鬼／懶過乜／白鴿眼Sale屎 唔好意思！又係關買衫事，不過行街實在是我工作範圍與工餘時間都會做的事。當然我亦不是要一竹篙打一船人，但也實在接觸過太多態度差劣的Sale屎姐姐與哥哥。好喇，要數第一憎的就是吊靴鬼Sale屎，即係呢，你睇衫時跟到你實一實，你掂一掂過啲衫就即刻整番齊啲衣架，扮晒勤力咁嗰隻呢…憎爆指數：憎 第二憎呢，就是懶過乜Sale屎喇，即係你同佢講你想試件黑色中碼，佢就求其响架上攞件同款但係姣婆紫中碼俾你，叫你試啱個size先再攞件黑色你又試過一次嗰隻！學劉華話事齋，今時今日咁嘅服務態度係唔要得㗎啦，無睇電視咩你？通常遇著這種情況，我都會insist佢入倉攞件黑色中碼俾我試。如果佢又insist埋一份呢，我就會順吓佢意攞住件姣婆紫中碼入fitting room，閂埋度門數５秒然後出番嚟再叫佢入倉攞件黑色中碼俾我試，唔洗做呀家陣？憎爆指數：憎憎憎 嗱，咁最憎呢，就莫過於白鴿眼Sale屎喇！相信呢隻唔洗解釋啦，不過卻真心的不明白他們憑什麼白鴿眼呢？即係呢，如果你讀得書多就唔洗做Sale屎啦，就算俾你响超級名牌LV、Chanel入面做，都始終不過係售貨 員一名，請問你憑咩睇人唔起呢？請問你知唔知自己份糧我可能其實有份出俾你嘅呢？還有，當這羣白鴿眼一知道我這次入舖目的原來是來借衫的話，他們的眼更會 呈嚴重反白狀態，相當嚇人。以我多年借衫經驗來說，要數全港最乞人憎的Sale屎，可能是中環安蘭街COMME des GARCONS的某高瘦平長髮黑面神女子！憎爆指數：憎憎憎憎憎憎
9.手提電話 其實是又愛又恨，不過肯定是憎多一點點。沒錯，手提電話是20世紀最偉大發明之一，可是我卻接受不了今時今日人們需要其之嚴重程度。也許是職業病，我很怕 聽見電話響起來的刺耳聲音，絕對不能接受24小時開著手提電話，睡覺前定必熄掉之。有時候，更會出了門口才醒覺自己留低了手提電話在家，也懶得取回（除非 是迫不得已的工作天）。星期六日直頭索性完全關機，樂得耳根清靜。也很怕別人在巴士地鐵上連環打電話，旁若無人地東扯西瞎的，討厭非常。大概手提電話唯一可愛之處，就是可以用來接收男朋友的甜蜜短訊吧！憎爆指數：憎憎
10.無線電視戲劇 點解？點解齣齣劇嘅劇情起承轉合、人物關係圖都由同一個模倒出來的？只是戲中背景不斷由醫院、法庭、警署、則師樓、雜誌社、學校、海味舖、股票行或任何「呢期興呀！」的行業裡面轉來轉去，故事對白卻毫無新意，完全的換煲不換藥。一個字：悶。還要來來去去都是爭家產呀，爭老公呀，爭女人呀，又再爭家產呀…大佬，每日返工經已夠累了吧！回家還要看一班醜無可醜、演技差勁的藝員你爭我奪，呼天搶地，一哭二鬧三上吊咁。香港人是不是真的如此醜陋，如此膚淺？還是香港人愈看這些鬧劇就愈如戲中人那般衰相？放過我吧！難度以後只能看《執到寶》與《大時代》DVD嗎？憎爆指數：憎憎憎
No comments:
Post a Comment